Nonton Kirab Tebu Manten ing PG. Madukismo

Ringkesan Artikel

Nonton Kirab Tebu Manten ing PG. Madukismo

Pengarang :Isti Nugroho

Sumber : Majalah Panjebar Semangat edisi 23, 4 Juni 2011

Ing PG. Madukismo ana tradhisi mirunggan kanggo mapag mangsa giling tebu kang aran kirab “Tebu Manten”. Kirab tebu manten kang katindakake dhek dina Jemuwah, 15 April 2011 kuwi kawiwitan saka Plataran Gedhung Pertemuan Maducandya. Duking uni tebu manten Kyai Sukro lan Nyai Pon iku sing samangkone bakal digiling sepisanan ana ing musim giling suling taun iki. Anggone menehi jeneng Kyai Sukro lan Nyai Pon iki dijumbuhake karo dina anggone bakal miwiti giling lan suling sepisanan, yaiku dina Rebo Pon, 20 April 2011. Anane kirab manten iki mengku surasa kang wigati, yaiku minangka simbolisasi kemitraan antarane para petani tebu klawan pihak pabrik gula.

Prosesi kirab tebu manten iki kawiwitan tabuh 14.00 saka Plataran Gedhung Pertemuan Madyacandya tumuju menyang stasiun giling kang ana sajrone komplek pabrik. Sadurunge mlebu stasiun giling, tebu manten dikirab mubeng beteng komplek PG. Madukismo sing dohe watara 1-2 kilometer. Arak-arakan diampingi para punakawan wayang purwa, marching band, rombongan kesenian tradisional, lan petani sarta karyawan PG. Madukismo kanthi ngagem busana Jawa.

Sawise tekan stasiun giling, para petani banjur masrahake secara simbolik Kyai Sukro lan Nyai Pon marang pangarsane PG. Madukismo, KRT. Maduduningrat, kang sabanjure tebu iki dipasang ana lawange mesin giling. Pasangan tebu manten iki sing bakal digiling sepisanan nalika proses penggilingan wis kawiwitan.