Novel Ngulandara-sinopsis

 Ngulandara

Sinopsis Novel dening Trisna

Novel Ngulandara punika cariyosipun dipunwiwiti oto mogok. Nalika kahanan sampun  sonten ugi jawah, otonipun kaluwarga Ajeng Tien kedah mogok wonten satunggaling mergi. Ramanipun Tien nyobi ndandani nanging dereng saged - saged, wusana kahananipin ngantos sonten banget, jawah saya deres, otonipun dereng saged urip. Boten dangu Den Bei sakeluwarga lajeng mlebet wonten oto. Manahipun tiyang sakaluwarga punika gusar sanget.

Boten langkung dangu wonten oto ingkang nyambangi. Lajeng jejaka ingkang nama Rapingun punika mbiyantu ndandani oto. Panjenenganipun boten purun nampi arta panuwunipun saking Den Bei. Kaluwarga langkung kuciwa sanget bilih jejaka wau boten purun nampani.

Wonten satunggaling dinten, Nyonyah Oet Hien, mitranipun Den Bei sowan supados badhe sadeyan emas. Nyonyah Oet Hien ugi karem nyade otonipun piyambak. Mangertos menawi oto punika oto ingkang diagem kaliyan Rapingun, Raden Ajeng Tien lajeng ndangu kaliyan Nyonyah Oet Hien. Boten klentu, sopir oto punika inggih Rapingun, jejaka ingkang mbiyantu kaluwarga Ngasisten. Oto kaliyan sopiripun lajeng dipunpundhut kaliyan kaluwarga.

Sopir pribadhinipun kaluwarga Ngasisten punika jejaka ingkang jujur, trampil, mrantasi, ugi sae pocapan saha tindak - tandukipun. Nglampahi pedamelan kanthi sucining manah, tansah ngabdi dhumateng kaluwarga Ngasistenan. Sadaya langkung remen dhumateng Rapingun.

Hel jaran liar kagungan kaluwarga mawon saged tundhuk kaliyan Rapingun. Menika amargi manahipun Rapingun ingkang sae, langkung sabar anggenipun ngruwat. Sedaya tindak - tandukipun Rapingun punika kedah ngedap - edapi kaluwarga.

Langkung dangu anggenipun ngudi wonten kaluwarga Ngasistenan, langkung raket ugi anggenipun memitran kaliyan putri Ngasistenan punika. Kekalihipun ugi sami remen ing batos. Sasampunipun kesumerepan menawi Rapingun punika salah satunggaling putra kraton ingkang kedah ngulandara, sedaya kaluwarga inggih sansaya gumun. Jejaka kraton purun nglampahi lelampahan kados punika. Boten klentu menawi tiyang punika inggih tiyang ingkang wicaksana, tiyang ingkang nggadhahi kaluhuran saha beciking bebudhen. Pantes menawi Raden Ajeng Tien punika lajeng dipunpundhut garwa kaliyan piyambakipun.

Petruk Kiyat dening Sumping Purba Kayun

Petruk Kiyat dening Sumping Purba Kayun

Trisna Dwi Setianingsih

Mega peteng tansah nutupi cahyaning surya. Mrepet-mrepet gelut rebutan hawa. Swasana Ngastina tansah abang mbranang kaya mawa. Kaya Duryudana sing kepengin numpas tapis tanpa tilas para Pandhawa. Dheweke arep misuda Narapati Basukarna dadi ratuning Ngamarta. Ora sudi yen sing bakalan dadi ratu bocah Pandhawa. Sengkuni lan Bathari tansah melu nyegkuyung Duryudana. Apa maneh Durna. Dheweke gething banget amarga saben-saben ana nugraha mesthi sing entuk para Pandhawa. Anake dhewe, Dewi Srani, ora tau sing jenenge entuk kanugrahan. Patih Sengkuni banjur nyiapake bala prajurit kanggo nantang lan nanting Pandhawa. Bocah-bocah Pandhawa padha di plekotho dening Duryudana sabala.

Ing Suralaya, Antareja, Antasena, Petruk, Gathotkaca, lan Arjuna uga padha rembugan sapa kang pantes dadi wakling Prabu Puntadewa, ratu Ngamarta iku. Arjuna sing bakalan dadi panitiane.

“Wis, aku milih Siwa Anoman sing bakalan tak wisuda dadi ratune. Anoman iki jos gandhos lho.” usule Arjuna.

Petruk ora saruju amarga Anoman iku awujud kethek, ora pantes jarene. Banjur Arjuna micara.

“Yawis yen ngono, Gathotkaca wae piye?”

“Wah aja, Gathotkaca iku senajan nduweni kasekten nanging ora nduwe kapinteran babar pisan”,Antareja nyanggahi.

“Lha yen Antareja apa Antasena kui wae kepriye?, padha saruju pora?” Arjuna usul maneh.

“Wah yen kuwi aku ora saruju, kuwi ki cah-cah ora genah, ora sampurna pokoke, wegah milih aku, ora pantes dadi ratu”. Gathotkaca nyanggahi usulane Arjuna.

“Apa kowe kuwi wae Petruk?, gelem pora, Truk dadi ratu?” Arjuna usul maneh.

Petruk kaget, lha kok malah dheweke melu ditareni. “Lho kok malah aku, aku iki wong asor, kawula rendahan. Ora pantes aku kok dadi ratu, aku iki wis matur nuwun banget bisa dadi penasehat Pandawa. Ora gelem aku”.

Arjuna mbales “ Kowe kuwi kok ya ngrendah wae ta, Truk. Aja alesan wae kowe kuwi. Saiki banjur arep kepriye?”

“Ngene wae, aji Sumping Purba Kayun kae enggonen. Rikala Babad Alas Wanamarta lak ya ngono ta?  Sapa-sapa sing kiyat bakalan dadi wakiling Prabu Puntadewa” Petruk menehi solusi.

“Yawis ayo mara nyang kedhaton, tak weruhi wujude pusaka pethingat Sumping Purba Kayun.” Arjuna banjur nderekake menyang kedhaton.

            Kethimik-kethimik para satriya mlaku ngampiri Sumping Purba Kayun. Siji mbaka siji padha njajal nyedhaki Sumping Purba Kayun. Giliran sepisanan yaiku Anoman. Anoman kendhel langsung maju nantang puska pethingat iku. Ora ngira sawise iku dheweke thenger-thenger ora kuwat. Banjur Gathotkaca maju, uga ora kuwat babar pisan. Antareja uga ora kuwat ndeleng wujude Sumping Purba Kayun. Saiki ganti Antasena sing njajal.

“Wah penak iki, penak, lha lha kok muter-muter iki, mabuk aku.” Antareja lap-lapan sawise ndeleng Sumping iki. Banjur mundur, gantian jatahe Petruk. Petruk maju.

“Lha nek iki seger tenan, ngelu-ngelu ilang, mumet bablas.” Wangsulae petruk sawise ngadhep Sumping Purba Kayun.

Sumping Purba Kayun nyatu ing awake Petruk. Dadine Petruk sing bakalan dadi ratu. Kabeh padha bungah, padha saruju dening keputusan iki. Ning njero ati Petruk ngrasakake bakalan ana akeh perkara kang kudu dilakoni. Dadi ratu kuwi mesthi entuk coba wrna-werna, kudu nduweni watak jembar segara. Kudu nduweni lelakon becik, alus, adil, jujur, ora milih-milih. Sawise entuk pusaka pethingat iku, Petruk dadi sansaya merbawani, beda karo Petruk mbiyen. Sifat-sifat kang becik iku wis campur ning raga. Petruk saiki wis pantes yen dadi wakiling Prabu Puntadewa. Apamaneh sawise didandani nganggo rasukaning ratu, tambah ketok alus budine.

Petruk ngandhani marang para Pandhawa yen ora let suwe Pandhawa bakal dadi siji nglawan Negara Ngastina, nglwan sedulure dhewe. Para Pandhawa padha kuwatir yen omonge Petruk iku kedadeyan temenanan. Liya dina wis mulai ketok tandha-tandhane. Kedadeyan iku tenan anane. Baladewa lan Duryudana mulai ngetokake sifat gething marang Pandhawa. Ora let suwe padha nantang gelut karo Pandhawa. Para Pandhawa ngrasa tumindak kang ala iki kudu disingkirke, aja nganti tumindak salah kok dinengke wae.

Anoman lan Pandhawa banjur siap-siap  mangkat perang. Petruk ngetutake saka mburi. Perang kang dirancang dening Duryudana sabala iki tujuane namung arep nyingkirake Pandhawa. Dheweke bakalan bungah banget yen bisa ngrusak Pandhawa. Baladewa nyengkuyung Duryudana melu merangi Pandhawa. Petruk ngadhepi Baladewa, nanging ora merangi temenanan. Petruk tansah umak-umik ing batin. Kok gelem-geleme Baladewa diapusi Duryudana. Manikmaya uga entuk pengaruh saka Durga. Dina iki ora perang gedhe.

Liya dina, Baladewa lan Kresna menyang Suralaya arep nyirnakake Petruk. Dheweke entuk wadulan saka Durga yen Suralaya iku geger amarga ketamon petruk. Sawise tekan, Petruk malah paweh kanugrahan. Satriya Ngamarta padha entuk wejangan. Pandhawa, Baladewa, lan Kresna padha dikandhani marang Petruk. Baladewa lan Kresna banjur njaluk ngapura marang para Pandhawa lan uga Petruk. Saiki kabeh wis ngrti sapa sing bener sapa sing luput, sapa sing kudu dilawan. Kabeh padha metu kanthi nggawa ati kang panas kaya entes diobong. Murup mbulat-mbulat ora karuwan. Pandhawa kang diboncengi karo Baladewa lan Kresna marani Duryudana sabalane. Kapethuk Kartamarma, utusane Duryudana. Langsung Kartamarma dipateni dening Werkudara nganggo kuku pancanakane.

Tancep Kayon

Sumping Purbo Kayun

SUMPING PURBO KAYUN

NASKAH WAYANG KATULIS DENING TRISNA, ANI WAHYU, REZANIA, LIS IGA, SANDRA
PAGELARAN WAYANG KULIT-DALANG KI SUNARYO-LAKON SUMPING PURBO KAYUN


Gunung gandheng gegandhengan, lenggak – lenggok hantaning ginaris urut kendhiting cakrawala. Lenggak – lenggok biru maya lam – lamen lamunak mega pethak kang hamayungi. Imbanging gunung mahendra. Wonten alas gung liwang Liwung gawat sinewingit bebasan jalma mala jalma wati manungsa lumrah mara bali mung kari arep. Akeh wreksa bung pang lanara samya tepang senajan ing wanci ranyakaten. Panasara sang hyang bagas kara mila senajan wanci raena, petenging ndumuk birungsakedhap – sakedhap kawis tingal pambauning aswajab miwah panggrauning singa barong. Saya muwe kekesing swasana. Pocap kala semanten sardula ingkang arsa madosi dununging sang hamaratapa lon – lonan lampah kaliyan saklebeting batos.

Macan

Lho lho lho.. Apa iya iki sang panemban sing tak goleki. Wuh bener, mawa cahya. Panemban kang wis dhateng mikir marang rusaking busana. Haduh panemban, nyuwun ngapunten kula pariwaksa ngerika anggen paduka hamaratapa. Panemban sanajan kula menika sardula, ning sejatosipun kula menika menungsa ingkang kesiku ing jawata. Ugi welasa kaliyan kula inggih panemban. Kula paduka panjenengan ngruwat kula mugi entuk kanugrahan. Ngrerepa kawelas arsa mawali – wali sardula nyuwun den ruwat dening pandhita. Kagol – kagel lan penggalihipun mung sardula. Lah sajake iki pandhita kok nyepelekake marang aku. Mangka dharmaning pandhita iku kudune seneng tetulungmarang sesama, bisa mahas maraning ngasepi kudu gelem mangun hayuning sesame. Pandhita kudu seneng tetulung nanging sajak nyepelekake marang aku. Ateges kowe ki pandhita ndog, njabamu putih njeromu kuning. Yen ora gelem ngruwat aku tak rimah – rimah kowe…

(macan gelut karo kresna)

Macan

Hehe jebul kowe, Kresna

Kresna

Kowe kok ngerti karo aku.

Macan

Aku ini sedulurmu sejatine.

Kresna

Aku ora duwe sedulur macan kayak owe. Kelakuanmu ora apik, kowe mung arep ngumbar hawa nafsu.

Macan

Ee, Kresna iki lali tenan karo aku. Jarene titising Wisnu, ning endi wisnumu, endi pintermu, jabul ora ngerti klawan aku. O.. iya, bebasane ning leng – leng semut bakal tak rogoh kowe. Hee.. mandheg kono.

Kocap kacarita teka mangkana, Prabu Sri Bathara Kuna wis badhar sejatining wujud, sigra napak dirgantara. Nanging dhateng ngertasangkan baraning bilahi angungkuli tugu ponang waja kang mawa prabu dhaup kawah kapidara.

Tan samar pamoring sukma, sinukmaya ing ngasepi, terlen hamung liyep -  layaping ngaluya e..e..

Kresna

(mlayu merga doyak macan, wusanane ing sawijining panggonan dheweke weruh ana tugu)

Jagade bathara ya jagad pangestungkara. Jarene aku napak gegana, aku ora weruh sangkar paraning bilahi. Bareng aku ngungkuli ponang tugu iki banjur semrepet panukunku. Aku tiba kapidara. Basan weruh kiblat tublas – tublas iki dudu sabarang tugu yen manut panyawangku, banjur iki tugu apa. Nanging sing dadi tugu mesthi entuk nugrahing jaut.

Macan

He Kresna aja mlayu kowe.. nyang lak – lakaning bakal tak rogoh kowe, yen ora gelem ngruwat aku tak udhet – udhet kowe.

Kresna

Mengko dhisik sardula, ya aku bakalan ngruwat kowe tenen.

Macan

Iya aku gelem

Kresna

Ning ana pitukone

Macan

Apa pitikone ?

Kresna

Waton kowe ora kiben ora janji, aku bakal nuruti. Iki sak mburiku iki ana tugu cacahe lima, yen bisa obrak – abriken lan balesane isa ora isa kowe bakalan tak ruwat.

Macan

Minggira tak obrak – abrike.

Tan samar pamoring sukma, sinukmaya winahya ing ngasepi ooo…

Janaka

rabu kula ngaturaken sagan para kami rawuh paduka.

Kresna

Jlitheng kakangku basaku tampar.

Janaka

Yayi samiaji, miwah adhiku dhewa gagah Werkudara

Kresna

Inggih kula tampi kanthi mabaning manah. Yayi, kula ngaturaken kasugengan dhateng kadang kua bharata pandhawa.

Janaka

Kados pundi papa prabu

Kresna

Kula ngertos ingkang dados tugu mawa cahya lan mawa wibawa. Kala wau jebul kadang kula bharata pandhawa. Yayi samiaji, dhimas Werkudara lan Nakula sadhewa. Kula mangertos manawi paduka nampi nugrahaning jawata. Nanging yayi, sarengipun kula matur ingkang kathah – kathah, kula nyuwun pangayoman yayi.

Janaka

Pengayoman kados punapa papa prabu ?

Kresna

Kula dipun oyak – oyak macan, ning sanajan wujude macan nanging menika sekti mahambara yayi.

Janaka

Werkudara..

Werkudara

Kene tak idak – idake

Bhumi ginjang – ganjing, langit krelap – krelap katon liriking samyalis risang maweh, gandrung – gandrung e…

Macan

Iki ana wong satriya dhegus gedhe bagus. Ora pangkling kowe Werkudara.

Werkudara

Kok ngerti karo jenengku kowe?

Macan

Endi wong pandhawa tak gagalake, endi Kresna..

Ee … Werkudara, kowe ora ngerti iki aku sapa?, aku iki gurumu sing nglatih perang gada lan perang bindhiki aku. Aku weruh pengapusanmu Werkudara, hayo.. aja mlayu kowe Werkudara.

Kresna

Dhimas werkudara.

Werkudara

Jlitheng kakangku, apa?

Kresna

Kepriye dhi anggonmu perang?

Werkudara

Lawanen dhewe, lha wong nyekukruk kaya ngene kalah apa menang?

Kresna

Tak tambani majua meneh ya dhi.

Werkudara

Emoh.

Kresna

Majua.

Werkudara

Wegah. Kowe peranga dhewe. Iki tambanana pupuku iki kucingen.

Kresna

Waras, waras, waras. Majua meneh dhi.

Werkudara

Wegah. Sekali wegah tetep wegah. Kowe majua.

Kresna

We lah cilaka. Kakang Semar.. reneya kakang semar..

Semar

Eh enten napa? Enten napa enjing – enjing nimbali kula?

Kresna

Kakang, iki mau macane pancen sekti mahambara. Aku ora kuwawa, dhimas Werkudara ya kapracundhang.

Semar

Lho wong sing gagah – gagah prakosa mawon boten keconggah, lho kok kula tiyang tuwek ken maju.

Kresna

Aku pitaya kakang Ismaya mesthi bisa.

Semar

Nek ngoten pundi macane kula huweg – huwege.

Tan samar pamoring sukma, sinukmaya winahya ing ngasepi ee..

Macan

Ee.. werkudara keplayu, iki kok ana wong tuwek, minggira..

Semar

Panjenengan kok ngarani tiyang sepuh, kula sampun ngertos sinten panjenengan punika.

Macan

Kowe minggira, iwak mulet, emoh aku karo wong tuwek.

Semar

Kula ngertos kalih panjenengan. Panjenengan lak sinuwun Mandura ta?

Macan

Haduh Semar, aku njaluk ngapura.

Semar

E e e.. Paduka ngonten kedahipun purun mawas dhiri.

Macan

Iya aku luput.

Semar

Kenging menapa kok namung sak Petruk kok nyabda paduka saged dados sardula dados macan menika. Menawi boten wonten ingkang ngemongi, ingkang ngembani mesthi boten saged. Pramila paduka kedah mawas dhiri, sampun kumawasa, sampun rumangsa bisa nanging bisa rumangsa, aja rumangsa gedhe ning sing gedhe rumangsane. Wong gedhe iki kanggo ngayomi wong cilik boten malah ngidak – idak dening liyan.

Macan

Iya kakang Semar, aku jaluk ngapura.

Semar

Yen ngonten sing marakake kaya ngonten niki sinten?

Macan

Kuwi mburimu kuwi, yayi Kresna. He yayi aku balekna dadi aku.

Kresna

Lho lho sanes kula.

Macan

Kowe sanggup karo aku jare arep ngruwat aku, bareng tugu wis tak obrak – abrik.

Semar

Sanes Kresna sing niki.

Macan

Ha sing endi?

Semar

Nika lho sing wau wonten Ngastina pethuk Kresna sing rupane ireng mau.

Macan

Weh bangsat.. Edan..

(macan ngoleki Kresna ireng. Sawise ketemu banjur gelut).

Macan

Heh, iki Kresna edan. (gelut, macan malih dadi wujud asli Baladewa).

Kresna

Kakang mas, kula nyuwun gesang.

Baladewa

Iblis, jebulna sing ndadeke wirang kaya ngene iki. Wiwit sore nganti esuk kaya ngene iki. Bajingan tengik kowe, wong sing nggawe sengsaraning urip. Pancen modar kowe. Pikir – pikir sing bener Petruk iki. Petruk aku jaluk ngapura Petruk.

(ketemu buta ing sawijining panggonan)

Buta

He wong pandhawa, amuk – amuk surah mrata jaya brata. Hayo endi wong pandhawa tak gagrake, tak jotos kupingmu kuwi. Ora pangkling kowe werkudara.

Werkudara

Kowe kok ngerti karo aku?

Buta

Ngerti wae, ayo manuta tak udhet – udhet kowe.

Werkudara

Kowe sing tak gurak.

Buta

Manut kudu manut kowe (banjur perang)

Kresna

Dhimas Werkudara kepriye buta ngamuk?

Werkudara

Wis kalah aku.

Kresna

Gayane wis kalah pindho.

Werkudara

Kalah maneh, wis apes dinaku, elek dina iki.

Kresna

Kakang Semar

Semar

Eh kula den.

Kresna

Reneya den.

Semar

Enten napa malih niki?

Kresna

Werkudara iki wis ora kuat nandhingi buta sak gunung anakan gedhe.

Semar

Lajeng inggih kula maneh?

Kresna

Tak kira yen Werkudara wis kalah pindho, mesthi ingkang Semar bisa menang pindho.

Semar

Endi kakang kula huweg – huwege.

Buta

He pandhawa padha keplayu iki malah wong tuwek elek kongkonane. Ayo minggira, iwakmu nyliliti ora enak wong tuwek.

Semar

E e e.. Kowe karo wong tuwek kok wani njangkar kaya ngono he? Iki kok aneh, wong sing elek we kepengin dadi bagus lah kok kowe sing bagus malah kepengin dadi buta. Karepmu kepriye?

Buta

Hayo kowe ki sapa mung ngalang – ngalangi lakuku wae.

Semar

Apa? Aku ora wedi karo kowe. Malihe tekek kowe, kowe lak guru ta?

(buta malih dadi wujud asline yaiku Manikmaya)

Manikmaya

Haduh kakang. Kakang Ngiswaya, aku jaluk ngapura ing kaluputanku kakang.

Semar

E e.. Pendhak – pendhak kowe mesthi gawe kliru, momonganku mesthi mbok rusuhi.

Manikmaya

Kakang.

Semar

Iya ta, kowe napa pragulane bojomu ta? Durga wadul nyang kowe, lak iya ta? Wis aja ngrusak momonganku. Momonganku rukun mbok rusak, seneng kowe?

Manikmaya

Kakang aku rumangsa atiku kagol.

Semar

Sebabe?

Manikmaya

Sang Hyang Putu winandhang guronake kanugrahan marang para pandhawa ra liwataku ning jebule nang hyang pinang.

Semar

Kowe ra liwat kowe, kowe tetep dadi ratuning dewa. Tegese kowe wis ora dipercaya. Sanajan kowe ratuning dewa nanging kelakuanmu sing sok menggak – menggok. Mulane tanganmu papat ki tegese sok climut, sok jipuk barang sing ora – ora. Kelakuanmu sing kurang apik, kurang resik. Mawasa dhiri, ngilo marang awakmu.

Manikmaya

Iya kakang aku jaluk ngapura, aku nampa wadulane Durga. Kaping pindhone, anakku Dewi Srani ora tau nampa nugraha.

Semar

Kuwi mergane Dewa Srani napa, jasane apa Dewa Srani, lan labuh labete nyang negara apa, nyang dewa apa? Nek pandhawa momonganku labuh labete ndedes kautamanlan pelabuhan wis gedhe banget. Pantes yen nampa nugraha. Lha nek anakmu ki apa, apa anakmu kuwi?

Manikmaya

Ya kakang aku wis ngaku salah.

Semar

Yen kowe wis ngaku salah banjur karepmu?

Manikmaya

Ing Suralaya saiki ana gara – gara saka pakartining petruk.

Semar

Wis minggira, mung sak petruk nggegerne Suralaya tegese kowe kudu mawas dhiri. Ndang baliya mumpung durung kawirangan.

Manikmaya

Kakang kula nyuwun pamit. (lunga)

Bhumi gonjang – ganjing langit krelap – krelap katon liriking samyalis risang maweh, gandrung – gandrung e…

Kresna

Kakang Semar

Semar

Eh wonten napa?

Kresna

Iki mau sang njuwang pukulum Giripati?

Semar

Iya, iki mau sang jagad Giripati, iki mau ya Manikmaya. Dheweke lara atine nampa wadulan dening bathara Durga.

Kresna

O o o .. Dadi ngono.

Semar

Inggih nampi wadulaning Durga. Kaping kalihipun samenika Suralaya geger poyang – paying ketamon gara – gara pakartinipun Petruk.

Baladewa

Yen ngono Petruk kudu disirnake.

Kresna

Iya kakang.

(budhal menyang Suralaya)

Petruk

Mangga ta ngger putra – putraku kabeh para pandhawa

Baladewa

Kula wonten dhawuh

Petruk

Iki ana prabu Puntadewa, ratu Kresna, prabu Baladewa.

Puntadewa

Nuninggih.

Petruk

Nuninggih pukulun.

Puntadewa

Nuninggih pukulun, dadi narendra ki kudune kudu ngetrapke pansapratama.

Puntadewa

Endi?

Petruk

Ingkang sepisan narendra kudu bisa palidharma, tegese narendra kudu bisa menehi pitutur ning uga bisa menehi conto aja mung ngandha thok ora bisa nyontoni. Iku tegese jarkoni, isa ujar raiso nglakoni.

Puntadewa

Nuninggih pukulun

Petruk

Kaping pindhone palimarma, narendra ki sing akeh pangapurane, aja gampang nibakne paukuman marang kawula. Apa maneh gampang – gampang gething mbunuh sengit nampa wadulan sing dudu – dudu kaya kowe ratu Mandura.

Kresna

Inggih kula lepat.

Petruk

Kudu diwiwiti luwih dhisik. Kaping telune mulat, tegese kudu awas lan ngerti iki barang iki nibakne apik apa ora. Kudune kudu bisa nata rasa, among rasa mijil tresna, ing kana pungkasane bisa agawe karya. Yen wong bisa nata rasane, ngemong rasane liya banjur thukul katresnane iku mengko diajak bisa saiyek saika praya kapti para kawula.

Kresna

Nuninggih pukulun, ngestukaken dhawuh.

Petruk

Dene kaping papat e kudu milala lan miluta, miluta tegese pimpinan daerah iki cedhak karo kawula. Narendra kudu cedhak karo kawula, aja malah adoh, awit kawula lan para pangarsaning praja ki pindhane iwak lan banyu, banyu lan iwak. Ing kono merdining para kawula kalawan para pangarsaning praja.

Kresna

Nuninggih ngestukaken.

Petruk

Kang pungkasan milala, milala seneng paring piweweh marang wong kang nandhang kacintrakan. Bebasane weneh pepeteng marang kang kalungyan, menehi paying marang wong kang kudanan, menehi sandhang marang wong kang kawudan. Dadi para pimpinan pangarsaning praja ki yen kawula sing ora mampu kuei kudu dibantu, aja malah kosok baline. Dadi pangarsaning praja ngendangi wong cilik ora ninggali ning malah njaluk sangu kuwi ora apik banget.

Gathotkaca

Inggih, inggih ngestukaken dhawuh.

Petruk

Werkudara..

Werkudara

Iya.

Petruk

Gathotkaca..

Gathotkaca

Inggih.

Petruk

Sira dadi bhayangkari negara iku sing eling lan waspada. Aja gampang percaya karo wong liyan. Anoman..

Anoman

Kula wonten dhawuh?

Petruk

Aja gampang – gampang..

Semar

Aku ngerti kowe dijak omong karo Dursasana e, mung kaya bulda marang ngono, bebasan nggedibal nggombal pitulikur ta.

Petruk

Nanging kowe anggayeng bawana minangka pamonging putra satriya setya budi kang ndheder kautaman lan mbangun lelabet.

Semar

Inggih ngestukaken dhawuh.

Petruk

Wis tak kira wakiling kawula wis ana, satriya kang ambeg satu budi, putuku Wisanggeni bakal tak jak bali marang kahyangan. Wis ngger, Puntadewa, kresna, kowe dadi potoning pandhawa, sing waskitha ya ngger.

Kresna

Ngestukaken dhawuh.

Petruk

Baladewa, kowe aja gampang kemlokroken.

Baladewa

Inggih ngestukaken.

Petruk

Werkudara, kowe sing jejeg. Kowe dadi jeksa sing jejeg, ngukum para kawula ki kudu sing jejeg ora miyar – miyur.

Werkudara

Iya tak ngestukne dhawuh.

Petruk

Gathotkaca lank owe Animan, sing ngati – ati ya.

Gathotkaca

Inggih

Petruk

Wis ya ngger. Ayo Wisanggeni pukulun nyang kahyangan ngger. Wis nek ngono aku ra kesuwen. Pukulun, ayo budhal nyang kahyangan.

(Petruk wis dadi kawula biasa)

Puntadewa

Petruk, aku ngaturne gunging panuwun, dene wis bisa nylametake nagara. Sanajan kowe dadi wong sudra, nanging kowe bisa paweh pitutur lan paweh conto klawan lelabuhan iku ora mandhang pangkat drajat klawan endhek dhuwuring kawula lan asor luhuring pangkat lan drajat. Kowe wong cilik nanging gedhe lelabuhanmu, Petruk.

Kresna

Iya petruk aku ngaturi gunging panuwun.

Baladewa

Iya Petruk, aku wis kapok sewu kapok. Aku jaluk ngapura, Truk. Kowe arep tak gatekne apa sing dadi kandhamu.

Petruk

Lho aku omong apa wau? Kula boten ngertos kokada apa gerangan.

Semar

Eh .. Kpwe ki mau bar setanen.

Petruk

Lha kok isa ya aku?

Semar

Inggih, panjenengan kok bisa.

Petruk

Halah kok basa, ampun ngonten ta ndara.

Semar

Inggih ndara, ndara Petruk. Raimu kala wau..

Petruk

Halah mulai.

Semar

Mulai? He Petruk, kowe senajan wujudmu wong sudra nanging gedhe panelangsamu, gedhe lelabuhanmu, sang hyang Wenang gelem sajiwa menyang kowe. Kowe minangka dadi keturunane sang hyang Wenang, mulane kiwe pantes sinembah dening para kawula.

Petruk

O o o.. ngonten ta. Nek ngono nyuwun pangapunten nggih den/

Semar

Sampun kirang pangapunten.

Puntadewa

Petruk, aku maturaken gunging panuwun. Dene kowe bisa nylametne. Kakang Anoman, kakang Semar kabeh aku njaluk pangestumu muga – muga bisa lestari widodo.

Petruk

Ee inggih. Amuk – amuk amuk – amuk…

Semar

O iya tak jejegane.

(Werkudara nekani Kartamarma arep jaluk pritungan)

Werkudara

Eh wong gemblung aja wani karo engsun. Jagonini Kurupati. Kowe nejeb bakal mati. Ora wurung kowe mesthi tak pateni..

(perang)

Werkudara

Iki sesuk baratayudha ya. Saiki njaluk tak cicil baratayudha ya..

Kartamarma

Heh, adhiku Werkudara.. Aku njaluk urip, aku arep mbok kapakne dhi?

Werkudara

Tak udhet – udhet nganggo kuku pancanaka e..

Kartamarma

Dhimas Werkudara, baratayudha durung mangsane dhi. Aja paten pinaten.

Werkudara

Haik,, hiak..

Baladewa

Balangen angin yayi.

Werkudara

Ya..

(Kartamarma mati)

Tancep Kayon